Dil-ġimgħa f'San Ġorġ

Il-kor Laudate Pueri jkanta fit-Tieni Għasar, tal-festa ta’ San Pawl Nawfragu

Il-bażilika ta’ San Ġorġ ukoll tat is-sehem tagħha fil-festi f’ġieħ San Pawl, li din is-sena ġew iċċelebrati bil-kbir fil-Munxar fl-okkażjoni ta’ l-1950 sena min-Nawfraġju ta’ l-Appostlu Missierna.  Mhux biss kien hemm attendenza tajba mill-parroċċa tagħna għall-Velja tan-Nawfraġju, li saret taħt tinda t-Tlieta fil-għaxija, imma l-Erbgħa 10 ta’ Frar 2010, nhar San Pawl, il-kor Laudate Pueri ġie mistieden ikanta fit-Tieni Għasar Solenni, fil-knisja parrokkjali tal-Munxar, li tmexxa mill-vigarju ġenerali tad-djoċesi Mons. Giovanni Bosco Gauci.  Il-kant polifoniku ta’ l-innu u s-salmi, taħt id-direzzjoni tal-Kan. George J. Frendo, ma setax ma jfakkarx lil min kien preżenti fl-Għosrien sbieħ tat-Tridu ta’ San Ġorġ f’Lulju.  Il-Kan. Tonio Galea, kappillan tal-Munxar, huwa wkoll membru “onorarju” tal-kor Laudate Pueri, li ilu msieħeb fih minn mindu kien għadu seminarista fil-parroċċa tagħna.  Fil-bażilika ta’ San Ġorġ, sadanittant, jum San Pawl ra folol kbar ta’ nies jimlew il-knisja għall-Quddies kollu.

Laqgħa għall-Grupp Santa Marta

Nhar il-Ħamis li għadda, 11 ta’ Frar 2010, inżammet fiċ-ċentru parrokkjali laqgħa informali tal-Grupp Santa Marta, li hu l-grupp fil-parroċċa, magħmul prinċipalment minn nisa, li jieħu ħsieb it-tindif tal-knisja fuq bażi regolari u volontarja.  Għal-laqgħa ta’ madwar tletin minuta, li bdiet għall-ħabta tal-5.00pm, attendew għadd ta’ voluntiera, u ġew mistħarrġa diversi modi ta’ kif it-tindif ikun iktar frekwenti u effiċjenti.  Il-Ħadd, stess, fil-fatt, ingħatat tindifa tajba lill-kor u l-presbiterju.

Funeral tal-Kan. Ġwann Scicluna

Nhar il-Ġimgħa fil-għodu nstemgħu t-tokki kiebja tal-qniepen tal-bażilika Ġorġjana jdoqqu mota ta’ mewt.  Wara ftit tal-ħin ġriet l-aħbar li l-Kan. Ġwann Scicluna, saċerdot, konfessur u eks-għalliem, ħalla dan il-wied tad-dmugħ.  Daqs ħmistax ilu l-Kan. Ġwann Scicluna, li jiġi z-ziju tal-mibki Mons. Salv Borg, arċipriet emeritu ta’ San Ġorġ, ġie rikoverat fl-iSptar Ġenerali ta’ Għawdex.  Hu miet nhar il-Ġimgħa 12 ta’ Frar 2010, għall-ħabta tad-9.15am, fl-età ta’ tmienja u sebgħin sena.  Il-funeral sar l-għada s-Sibt 13 ta’ Frar.  Fis-2.30pm il-fdalijiet tiegħu ġew trasferiti mill-Isptar Ġenerali ta’ Għawdex għall-knisja tas-sorijiet Franġiskani tal-Qalb ta’ Ġesù fi Strada Palma, fil-belt Victoria.  Fit-3.15pm, imbagħad, il-kapitlu kanta flimkien mal-poplu l-Għasar ta’ l-Uffiċċju tal-Mejtin.  Wara, it-tebut tal-Kan. Scicluna, akkumpanjat mill-kapitlu u l-kleru ta’ San Ġorġ, il-familjari u folla sabiħa ta’ nies, inġarr lejn Triq ir-Repubblika, fejn il-korteo għadda minn Pjazza Indipendenza u Pjazza San Ġorġ, u ddaħħal ġewwa l-bażilika ta’ San Ġorġ.  Fl-4.00pm l-isqof ta’ Għawdex, Mons. Mario Grech, mexxa l-Quddies presente cadavere, b’numru sabiħ ta’ saċerdoti, kemm mill-parroċċa tagħna u kemm mid-djoċesi ta’ Għawdex, jikkonċelebraw miegħu.  Fl-omelija l-Isqof tkellem fuq il-kwalitajiet saċerdotali ta’ Dun Ġwann bħala edukatur u konfessur, u ħeġġeġ lill-fidili biex jitolbu għal iżjed vokazzjonijiet saċerdotali.  Leħen il-Belt Victoria, l-istazzjon tal-komunità ta’ San Ġorġ, xandar din il-Quddiesa diretta għall-benefiċċju tas-semmiegħa.

Festa parrokkjali tal-Verġni Mqaddsa ta’ Lourdes

Nhar is-Sibt li għadda wkoll, fil-parroċċa tagħna saret il-festa tal-Verġni Mqaddsa ta’ Lourdes.  Mill-Erbgħa ta’ qabel beda t-Tridu bi tħejjija għal din il-festa, fejn fit-tlitt ijiem ta’ tħejjija – l-Erbgħa 10, il-Ħamis 11 u l-Ġimgħa 12 ta’ Frar 2010 – l-arċipriet emeritu Mons. Ġużeppi Farrugia ċċelebra l-Quddiesa tas-6.00pm b’omelija teoloġika fuq l-istess festa.  Wara kull Quddiesa kien hemm mument ta’ adorazzjoni li fi tmiemu Mons. Feliċ Tabone ta l-barka Ewkaristika.  Imbagħad, is-Sibt 13 ta’ Frar, nhar il-festa tal-Verġni Mqaddsa ta’ Lourdes, fis-6.00pm l-Arċipriet mexxa konċelebrazzjoni solenni, bis-sehem ta’ numru sabiħ ta’ Fratelli tal-Kurċifiss kif ukoll voluntiera ta’ l-Ordni ta’ San Ġwann ta’ Malta.  Il-purċissjoni Marjana aux flambeaux bl-istatwa tal-Madonna ta’ Lourdes ma ħarġitx minħabba t-temp ikrah u l-maltemp li laqat lill-gżejjer tagħna f’dawn il-jiem.

Ħareġ il-Programm tar-Randan 2010

Din il-ġimgħa ġie ffinalizzat u ppubblikat il-programm tar-Randan mill-uffiċċju parrokkjali.  Dan il-programm tqassam mal-bulettin ta’ tmiem il-ġimgħa li għaddiet.  Fih jinkludi l-attivitajiet u l-liturġiji kollha bejn il-lum, l-Erbgħa 17 ta’ Frar 2010, l-Erbgħa tar-Rmied, u l-Ġimgħa 26 ta’ Marzu 2010, tifkira popolari tad-Duluri.  Fuq il-qoxra ta’ quddiem ta’ dan il-ktejjeb, b’format modern, insibu ritratt mill-isbaħ tal-Kurċifiss mirakuluż tal-bażilika ta’ San Ġorġ, meħud minn Joe Attard meta dan kien fil-kor tal-bażilika fl-aħħar jiem tar-Randan tas-sena l-oħra.  Insibu d-dettalji tal-ħames korsijiet ta’ eżerċizzi li sa jsiru, bid-dati u l-predikaturi rispettivi tagħhom.  Is-siltiet tal-qari taħt kull ġurnata huma adattati mill-Messaġġ tal-Papa Benedittu XVI għar-Randan 2010.  Min għal xi raġuni jew oħra ma rċeviex kopja ta’ dan il-programm, għandu jiġbor waħda mill-uffiċċju parrokkjali jew inkella jniżżlu minn din il-websajt.  Il-lum ġie ppubblikat ukoll poster bid-dettalji ta’ l-eżerċizzi tar-Randan.

Xogħol ta’ tiġdid fl-istudjows ta’ Leħen il-Belt Victoria

Bħalissa fl-istudjows ta’ l-istazzjon tar-radju tal-komunità ta’ San Ġorġ, Leħen il-Belt Victoria, qed isir upgrading tas-sistema kif ukoll xi stallazzjonijiet ġodda.  Wara madwar kważi xahar u nofs, l-online streaming reġa’ ġie għan-normal.  Hekk, min ikun jixtieq jisma’ r-radju minn fuq l-internet, speċjalment l-emigranti tagħna, issa jista’ jagħmel dan bla ebda xkiel.  Ġew stallati wkoll upgrades importanti u nxtara apparat li bih l-istazzjon tagħna jista’ jaħdem aħjar u b’mod aktar modern u effiċjenti.  Xi problemi li kienu qed jinqalgħu spiss fl-aħħar xhur issa ġew solvuti.  John Cauchi, tal-PRO Studios (Ta’ Sannat), f’dawn l-aħħar jiem għamel sigħat twal fil-bini ta’ l-istudjows tagħna jirranġa u jtejjeb is-sistema.  Barra minn hekk, wara l-esperiment ta’ l-online video streaming li għamilna fil-festa ta’ San Ġorġ li għaddiet, li kien suċċess enormi mas-semmiegħa tagħna, hu l-ħsieb ta’ l-uffiċċju parrokkjali li f’kollaborazzjoni ma’ l-istazzjon tar-radju jerġa’ joffri dan is-servizz fil-Ġimgħa Mqaddsa u l-festa liturġika ta’ San Ġorġ.  L-ispejjeż m’humiex żgħar, għalhekk min jixtieq jagħti xi donazzjoni jista’ jagħmel dan billi jikkuntattja lil Frank Schembri jew lil Mons. Feliċ Tabone.  Kull donazzjoni, żgħira kemm hi żgħira, tiġi apprezzata.

Printer Friendly Version Send Article to a Friend

Name A value is required. Invalid format.	Email Address: A value is required. Invalid format.
Please enter the text above exactly as it appears (case sensitive)
When you click on "Submit Comment", a confirmtion email is automatically sent to the address you specified above. You will then be required to confirm this comment by clicking the link provided in this email that you will receive. Comments also need to be confirmed by the administration.