Nhar it-Tlieta li għaddew, 2 ta’ Frar 2010, il-Knisja ċċelebrat il-festa tal-Preżentazzjoni tal-Mulej, magħrufa wkoll bħala l-Gandlora.Fl-istess ġimgħa tneħħa l-presepju li kien armat fil-kappella ta’ Ġesù u Marija.Għalkemm iż-żmien liturġiku tal-Milied għalaq mal-festa tal-Magħmudija tal-Mulej, hi tradizzjoni f’ħafna pajjiżi li l-presepju jibqa’ barra sal-Gandlora. Din hi r-raġuni għaliex fil-bażilika tagħna wkoll il-presepju nżamm armat sa din il-ġurnata.Fost dawk li ħadmu flimkien ma’ l-artist, George Camilleri, fil-bini tal-presepju u t-tqegħid f’postu, kien hemm il-mastrudaxxa Ino M. Attard li bena struttura fl-injam bħala bażi għall-presepju, u Ivan Galea li ħa ħsieb id-dawl, dejjem taħt is-sorveljanza tal-Kumitat tal-Manutenzjoni tal-bażilika mmexxi minn George Francis Vella.Dan il-presepju mill-isbaħ kien ġie inawgurat fil-bidu tan-Novena tal-Milied tas-sena li għaddiet. Il-presepju żżarma fuq jumejn: iI-Ħamis 4 ta’ Frar iddaħħlu l-pasturi, li wkoll huma xogħol fin u aristiku ħafna ta’ Sqallija, filwaqt li l-għada l-Ġimgħa, wara l-Quddiesa tas-7.00pm ġiet żarmata l-istruttura tal-presepju.
Il-Kummissjoni Djoċesana Żgħażagħ ta’ Għawdex, is-Sibt li għadda, 6 ta’ Frar 2010, laqqgħet żewġ rappreżentanti minn kull parroċċa għal laqgħa, li saret fiċ-Ċentru Pastorali Ragħaj it-Tajjeb, Taċ-Ċawla, fejn ġew diskussi t-tħejjijiet djoċesani min-naħa taż-żgħażagħ Għawdxin għaż-żjara tal-Papa Benedittu XVI.Minn San Ġorġ attendew Francesco Pio Attard u Andrew Formosa, f’isem il-Grupp 23four>>.Attiva ħafna fi ħdan il-KDŻ ta’ Għawdex hi Dorienne Portelli, ukoll mill-parroċċa ta’ San Ġorġ.Fost l-oħrajn tħabbar li l-attendenza għaċ-ċelebrazzjoni tal-Papa maż-żgħażagħ fil-Valletta Waterfront, nhar il-Ħadd 18 ta’ April, wara nofs in-nhar, trid issir b’reġistrazzjoni.Il-gruppi taż-żgħażagħ f’kull parroċċa sa jkunu responsabbli li jħeġġu ż-żgħażagħ jitħejjew u finalment jattendu għall-attivitajiet.Iktar tagħrif ’il quddiem, waqt li fir-Randan sa jittieħdu bosta inizjattivi.Min irid, imma, diġà jista’ jżur il-websajt tal-KDŻ ta’ Malta għal iktar tagħrif u applikazzjonijiet: www.kdz.org.mt.
Laqgħa għaż-żgħażagħ fiċ-ċentru parrokkjali
Iktar fuq iż-żgħażagħ, nhar is-Sibt li għadda, 6 ta’ Frar 2010, ġiet organizzata laqgħa għaż-żgħażagħ f’waħda mill-kmamar taċ-ċentru parrokkjali.Il-laqgħa bdiet għall-ħabta tas-7.30pm u kienet immexxija minn Mons. Ġużeppi Farrugia, arċipriet emeritu, li ħa l-inizjattiva li ssir, f’kollaborazzjoni mal-Grupp 23four>> tal-parroċċa.Għal din il-laqgħa attendew madwar ħamsa u għoxrin żagħżugħ u żagħżugħa, li aċċettaw l-istedina biex jibdew jattendu għal xi laqgħat ta’ formazzjoni.Mons. Farrugia beda l-laqgħa b’talba u mbagħad espona l-iskop ta’ dawn il-laqgħat, waqt li tkellem ukoll fuq l-istorja tal-grupp taż-żgħażagħ tal-parroċċa 23four>>, li kien twaqqaf fi żmien l-arċipretura tiegħu b’inizjattiva li ttieħdet flimkien ma’ xi żgħażagħ oħra, fosthom Tonio Galea, dak in-nhar seminarista, Michael Formosa u Antonella Zammit.Hu żied jgħid li fil-parroċċa tinħass il-ħtieġa li ż-żgħażagħ jerġgħu jibdew jiltaqgħu regolarment, wara li kien hemm żmien twil fejn dan ma kienx isir ħlief għal waqtiet okkażjonali.Matul din il-laqgħa kien hemm diskussjoni li involviet ukoll lil dawk preżenti, li qasmu ħafna mis-sentimenti msemmija.Mons. Farrugia tkellem ukoll fuq kif iż-żagħżugħ irid jimxi wara l-patrun tagħna San Ġorġ u fuq kif għandu jagħmel dan, fid-dawl tal-valuri tal-Vanġelu li huma tant mhedda l-lum.Hu tkellem ukoll fuq il-possibbiltà u x-xewqa li s-sena d-dieħla jitla’ grupp ta’ żgħażagħ għall-Jum Dinji taż-Żgħażagħ fi Spanja, imma wkoll fuq possibbiltajiet ta’ esperjenzi oħrajn flimkien.Fl-aħħar mumenti tal-laqgħa għadda jsellem liż-żgħażagħ preżenti l-arċipriet Mons. Pawlu Cardona.L-organizzazzjoni issa sa tkun f’idejn kumitat żgħir li sa jaħdem id f’id ma’ Mons. Farrugia u ma’ l-amministrazzjoni tal-Grupp 23four>>, u fil-fatt l-appuntament għal laqgħa oħra diġà ġie ffissat għal nhar is-Sibt li ġej, 13 ta’ Frar, eżatt wara li tidħol il-purċissjoni ta’ Lourdes.
Bandiera Ġorġjana tiċċelebra rebħa fil-futbol Għawdxi
Minkejja li m’hux l-iskop prinċipali ta’ din ir-rubrika li tagħti aġġornamenti sportivi, ma nistgħux ma ninnutawx kif, wara r-rebħa tal-Victoria Hotspurs FC bl-iskor ta’ 3-1 kontra l-SK Wanderers nhar il-Ħadd li għadda, 7 ta’ Frar 2010, fi tmiem it-tieni round tad-Division 1 League, mal-faċċata tal-kwartieri tal-klabb, fi Triq Enrico Mizzi, ġiet imdendla l-bandiera Ġorġjana.L-“affinità” ta’ dan it-tîm tal-futbol Rabti mal-partit Ġorġjan, jew aħjar ma’ Ta’ l-Istilla, hi magħrufa biżżejjed fost dawk kollha li jsegwu l-futbol lokali.Awguri lill-Victoria Hotspurs għal din ir-rebħa, imma wkoll lit-timijiet l-oħrajn tar-Rabat – l-Oratory Youths u l-SK Wanderers – għall-mod sân kif qed jippromovu l-isport fost it-tfal u l-adoloxxenti fil-belt tagħna, u għall-isem li qed jagħmlulha ’l barra minnha.
Tinħareġ l-istatwa tal-Madonna ta’ Lourdes
Nhar il-Ħamis li ġej, 11 ta’ Frar 2010, issir it-tifkira liturġika ta’ l-ewwel dehra tal-Verġni Mbierka lil Bernardette Soubirous, li ġrat fl-istess ġurnata tas-sena 1858 fl-għar ta’ Massabielle, f’Lourdes, fi Franza.Ftit tas-snin wara li seħħu dawn l-avvenimenti, fil-parroċċa tagħna bdiet id-devozzjoni Marjana lejn il-Verġni Mqaddsa ta’ Lourdes.Kif ġara fl-aħħar snin, din il-ġimgħa sa jsiru tlitt ijiem ta’ tridu, immexxija mill-arċipriet emeritu Mons. Ġużeppi Farrugia, biex imbagħad nhar is-Sibt li ġej, jum il-festa parrokkjali, issir konċelebrazzjoni solenni u, jekk jippermetti t-temp, toħroġ purċissjoni Marjana aux flambeaux bl-istatwa tal-Verġni Mbierka madwar it-toroq tal-bażilika Ġorġjana, li fiha jieħdu sehem ukoll it-tfal tal-parroċċa.Fil-fatt nhar it-Tnejn 8 ta’ Frar, fil-għodu, ġiet armata l-istatwa sabiħa tal-Madonna ta’ Lourdes fil-korsija.L-istatwa tal-kartapesta nħadmet mid-ditta Galard et Fils ta’ Franza.Fis-sena 1879 inġabet f’Għawdex u ġiet imbierka mill-isqof ta’ dak iż-żmien Mons. Pietru Pace.Din l-istatwa turi lill-Verġni Mbierka u lil Bernardette fil-qagħda u l-ilbies tradizzjonali ta’ dak iż-żmien.Ma’ din l-istatwa ntrema wkoll pavaljun mill-isbaħ, bl-għajnuna ta’ Tonio Debattista.
San Pawl iċċelebrat ukoll f’San Ġorġ
Nhar it-Tnejn fil-għaxija ntrema wkoll l-altar ta’ San Pawl għas-solennità tal-lum tan-Nawfraġju ta’ San Pawl. Ġie armat bil-ventaltar u l-gwarniċ, u nħarġu wkoll l-anġli fuq dan l-altar.Il-bieraħ, ġewwa l-pjazza tar-raħal tal-Munxar, taħt tinda mdaqqsa, ġiet organizzata velja djoċesana tan-Nawfraġju ta’ San Pawl, fl-okkażjoni speċjali ta’ din is-sena li fiha nfakkru l-1950 anniversarju mill-miġja ta’ l-Appostlu Missierna f’pajjiżna.Fil-fatt il-velja serviet ukoll ta’ bidu uffiċċjali għat-tħejjija għall-miġja tal-Papa Benedittu XVI f’Malta għall-istess okkażjoni, f’April li ġej.Il-velja bdiet fis-6.00pm, u barra Quddiesa, tulha tqabbdet ukoll ħuġġieġa u fi tmiemha saret translazzjoni solenni tar-relikwa ta’ San Pawl.Mexxa l-isqof Mons. Mario Grech, bis-sehem ta’ bosta saċerdoti tad-djoċesi, fosthom kleru minn San Ġorġ.Biex kulħadd seta’ jattendi għal din il-velja, l-aħħar Quddiesa fil-parroċċi kollha, inkluż San Ġorġ, il-bieraħ kienet fl-4.30pm.Min-naħa l-oħra l-lum, l-10 ta’ Frar, fil-bażilika ta’ San Ġorġ ġiet iċċelebrata konċelebrazzjoni solenni fid-9.00am, immexxija mill-arċipriet Mons. Pawlu Cardona.
