Dil-ġimgħa f'San Ġorġ

Saċerdoti Ġorġjani jagħtu taħdidiet f’konferenzi għall-kleru djoċesan

Nhar il-Ħamis 28 ta’ Jannar 2010, festa tat-teologu ċelebri Kattoliku San Tumas ta’ Aquino, is-Seminarju Maġġuri ta’ Għawdex fakkar l-affiljazzjoni tiegħu ma’ l-Università Pontifiċja Angelicum ta’ Ruma b’konferenza bit-tema “It-Teoloġija tas-saċerdozju f’San Tumas ta’ Aquino”, minn Patri Christopher Caruana op.  Kienet taħt il-patroċinju ta’ l-isqof djoċesan Mons. Mario Grech u attendew għaliha s-saċerdoti u s-seminaristi tad-djoċesi.  Fil-jiem ta’ qabel din il-konferenza, bejn it-Tnejn 25 u l-Erbgħa 27 ta’ Jannar, il-Kummissjoni Kleru tad-djoċesi organizzat kors ta’ aġġornament għall-kleru Għawdxi fis-Seminarju tal-Qalb ta’ Ġesù, ir-Rabat.  It-Tnejn interviena l-arċipriet emeritu tal-parroċċa tagħna Mons. Ġużeppi Farrugia, professur tat-Teoloġija Dommatika fl-Università ta’ Malta u fl-istess Seminarju Maġġuri ta’ Għawdex, li għamel taħdita fuq is-sagrament ta’ l-Ewkaristija.  L-għada t-Tlieta mess lill-Kan. George J. Frendo, saċerdot ieħor tal-parroċċa tagħna li hu professur tat-Teoloġija Morali fis-Seminarju Maġġuri, li tkellem fuq is-sagrament taż-Żwieġ.  Fl-aħħar ġurnata tas-sett ta’ konferenzi, l-Erbgħa, kien trattat is-sagrament tal-Penitenza b’taħdita minn Mons. Anton Borg, ukoll professur tat-Teoloġija Morali.  Wara t-taħdidiet ta’ kull ġurnata, saret diskussjoni fuq is-suġġett partikulari fost is-saċerdoti preżenti.  Kif wieħed jista’ jikkonkludi waħdu, numru sabiħ ta’ saċerdoti mill-parroċċa tagħna huma kkwalifikati f’oqsma differenti tat-Teoloġija Kattolika u mfittxija għal taħdidiet u konferenzi, anki barra minn xtutna.  Dan biex ma nsemmux oħrajn li jokkupaw karigi għoljin, dejjem b’servizz lejn il-Knisja Kattolika.

Laqgħat u tħejjijiet għar-Randan

Fil-ġranet li għaddew fl-uffiċċju parrokkjali kompliet il-ħidma ta’ tħejjija intensiva tal-programm parrokkjali tar-Randan u l-Ġimgħa Mqaddsa, li mistenni joħroġ fi żmien qasir.  Fil-laqgħa tal- Kunsill Pastorali Parrokkjali, li saret il-Ħamis, kif ukoll f’dik tal-Presbiterju Parrokkjali, li ltaqa’ l-bieraħ it-Tlieta, fost l-oħrajn ġie diskuss il-programm liturġiku tar-Randan.  Diġà ġiet imħabbra attività interessanti għaż-żgħażagħ, b’email li ntbagħtet liż-żgħażagħ kollha.  Din hi live-in tar-Randan għaż-żgħażagħ tal-parroċċa bejn il-Ġimgħa 12 u s-Sibt 13 ta’ Marzu 2010.  Hu essenzjali li dawk li jixtiequ jieħdu sehem jikkonfermaw l-attendenza tagħhom qabel tmiem din il-ġimgħa, billi jibagħtu email fuq info@23four.org, jew jikkuntattjaw rappreżentant tal-Grupp 23four>> fuq wieħed minn dawn in-numri: 79 851 118 jew 79 256 897.

Il-banner tal-Mużew lura f'postu

Wara li r-riħ qawwi ta’ xi tliet ġimgħat ilu qalgħu minn postu u bilkemm ma kienx ċarrtu, il-banner imtella’ mill-Fondazzjoni Belt Victoria bi promozzjoni għall-proġett tal-Mużew u Ċentru Kulturali fil-qalba ta’ beltna, il-ġimgħa l-oħra reġa’ sab postu marbut sewwa ma’ l-istruttura tal-ħadid li hemm quddiem il-faċċata tal-bażilika, fuq il-lemin.  Fl-aħħar ġimgħat komplew deħlin iktar għotjiet ta’ benefatturi ġenerużi li qed jinteressaw ruħhom fil-proġett, waqt li l-kuntratt tal-Fondazzjoni mad-diviżjoni ta’ l-ippjanar ta’ proġetti Ewropej fi ħdan l-Uffiċċju tal-Priministru issa wasal biex jiġi ffinalizzat.  Wara dan, ma jifdal l-ebda intopp sinifikanti ieħor biex il-proġett jista’ jibda jiġi implimentat “fiżikament”.  Kulħadd hu mistieden jagħti d-donazzjoni tiegħu lir-rappreżentanti tal-Fondazzjoni, li għandha l-uffiċċju tagħha fit-tieni sular ta’ Dar Leħen il-Belt Victoria, fi Pjazza San Ġorġ.

San Ġwann Bosco ċċelebrat fl-Oratorju

Fi tmiem il-ġimgħa ġiet iċċelebrata l-festa ta’ San Ġwann Bosco fl-Oratorju Don Bosco, ir-Rabat, Għawdex.  It-temp fl-aħħar ġurnata ppermetta, allura l-purċissjoni setgħet toħroġ bla xkiel ta’ xejn.  Fil-programm tal-festi u attivitajiet li ħareġ l-Oratorju Don Bosco, fost l-oħrajn ġew mistiedna l-arċipriet tal-bażilika ta’ San Ġorġ, Mons. Pawlu Cardona, kif ukoll il-kor tal-bażilika Laudate Pueri.  Fil-fatt l-arċipriet Cardona mexxa l-Quddiesa ta’ lejlet il-festa, nhar is-Sibt 30 ta’ Jannar 2010, fis-7.00pm, filwaqt li l-kor Laudate Pueri, taħt id-direzzjoni tal-Kan. George J. Frendo, anima l-konċelebrazzjoni pontifikali mmexxija mill-E.T. Mons. Mario Grech, isqof ta’ Għawdex, li saret f’jum il-festa, nhar il-Ħadd 31 ta’ Jannar.  F’San Ġorġ, għall-Quddies tas-Sibt u l-Ħadd, inħarġet bħal kull sena fuq il-presbiterju l-kopja tal-pittura ta’ San Ġwann Bosco li għandna miżmuma fis-sagristija.

Ġbir għall-Art Imqaddsa fi tmiem il-ġimgħa

Fil-Quddies kollu li sar fi tmiem il-ġimgħa li għaddiet saret il-ġabra annwali għall-Art Imqaddsa, mill-patrijiet Franġiskani Minuri li għandhom f’idejhom il-ħarsien tas-santwarji Kristjani.  F’kull Quddiesa tas-Sibt fil-għaxija u l-Ħadd li għaddew, Fra Lorrie Zerafa ofm u Patri Stephen Magro ofm ħarġu jiġbru, f’isem il-Kustodja Maltija ta’ l-Art Imqaddsa, id-donazzjonijiet ta’ dawk preżenti għall-Quddies fil-bażilika.  Qabel kull Quddiesa Fra Lorrie, li hu minn Għajnsielem, ta messaġġ qasir fejn spjega eżatt x’inhu s-sinifikat ta’ din il-ġabra u għal min kienu qed jagħtu l-flus in-nies.  Fil-Quddiesa tat-Tfal, fil-ħin ta’ l-omelija hu għamel ukoll spjega ħafifa lit-tfal preżenti.  Din il-ġabra, li ssir f’kull parroċċa f’Malta u Għawdex, tgħin ħafna biex il-Franġiskani jissoktaw il-ħidma tagħhom fl-art ta’ Ġesù, li tieħu diversi forom, prinċipalment il-ħarsien tad-diversi siti għeżież li għandhom taħt il-kustodja tagħhom.  Fi Frar li għadda l-parroċċa ta’ San Ġorġ organizzat b’suċċess pellegrinaġġ lejn l-Art Imqaddsa, f’kollaborazzjoni mal-Kustodja Maltija.

Dun Jimmy arċipriet in-Nadur

Din il-websajt kienet l-ewwel waħda li ħabbret uffiċjalment in-nomina ta’ Mons. Jimmy Xerri bħala arċipriet tal-parroċċa ta’ San Pietru u San Pawl, fin-Nadur.  Dun Jimmy hu saċerdot mill-presbiterju ta’ San Ġorġ, u għalkemm ilu mbiegħed mill-ħajja parrokkjali tagħna snin twal, dejjem baqa’ qrib tal-komunità tagħna, ta’ l-inqas fl-ispirtu!  Għalkemm jifirdu lil Dun Jimmy mill-attività pastorali li hu beda l-ewwel f’San Ġorġ hemm, mhux biss il-ħmistax-il sena li għadda bħala missjunarju fil-Brażil – fejn qeda l-Knisja kemm bħala kappillan u kemm bħala rettur ta’ seminarju inter-djoċesan –, imma wkoll snin twal ta’ servizz lid-djoċesi Għawdxija ma’ djul l-isqof Cauchi u bħala wieħed mis-saċerdoti attivi fiz-zona ta’ Taċ-Ċawla, ħafna għadhom jiftakru l-ħeġġa li biha ta l-ħajja ċ-ċentru parrokkjali tagħna meta kien għadu seminarista.  L-aħbar tal-ħatra tiegħu xxandret b’mota solenni tal-qniepen Ġorġjani, nhar it-Tnejn 1 ta’ Frar 2010, fis-6.00pm.  Dun Jimmy sa jkun qed jieħu post Mons. Salv Muscat, li mexxa l-parroċċa tan-Nadur għal dawn l-aħħar 27 sena.

Iċċelebrata l-Gandlora

Il-bieraħ, it-Tlieta 2 ta’ Frar 2010, fis-6.00pm, l-Arċipriet mexxa konċelebrazzjoni solenni fil-bażilika bis-sehem tal-kapitlu u l-kleru, fil-festa tal-Preżentazzjoni tal-Mulej.  Fil-bażilika tagħna din is-sena nżammet it-tradizzjoni popolari li l-presepju jinżamm armat barra sa din il-ġurnata.  Fil-fatt il-presepju sabiħ mibni minn George Camilleri mistenni jiżżarma din il-ġimgħa.  Imma… m’hux sa jistenna sena oħra biex jerġa’ jara d-dawl.  Aktarx jerġa’ jintrama iktar tard din is-sena fl-okkażjoni ta’ żjara ta’ grupp kbir ta’ presepisti Taljani fil-gżira tagħna.

L-arkivju elettroniku tal-bulettin parrokkjali

Minn din il-ġimgħa parti mill-websajt ta’ San Ġorġ ġiet aġġornata b’format differenti, u aktar modern u aċċessibbli.  Is-sezzjoni ta’ fejn jitla’ l-bulettin parrokkjali ta’ kull ġimgħa, f’verżjoni PDF, ġiet aġġornata b’sistema aktar effiċjenti u moderna.  Minflok dik il-lista twila li fiha kienu jidhru d-dati tal-bulettin ta’ kull ġimgħa, fejn wieħed kien idum biex isib xi ħarġa ta’ ġimgħat ilu li jkun qed ifittex, issa fi ftit sekondi tista’ ssib id-data tal-bulettin ta’ dik il-ġimgħa partikulari li jkollok bżonn.  Fil-paġna Weekly Bulletin, isfel nett, issa jidhru tliet kaxxi, fejn wieħed kemm jagħżel id-data tal-ħarġa li jkun qed ifittex: meta ssib is-sena mill-ewwel kaxxa u x-xahar mit-tieni, fit-tielet kaxxa awtomatikament jitilgħu d-dati li fihom il-bulettin parrokkjali ħareġ f’dak ix-xahar ta’ dik is-sena partikulari.

Iktar siġġijiet għal San Ġorġ

Dalwaqt sa tasal f’San Ġorġ it-tieni kunsinja ta’ mitt siġġu ġdid għall-bażilika u ċ-ċentru parrokkjali ta’ San Ġorġ.  Dawn is-siġġijiet sa jqumu €2,500, u parti sostanzjali minn din iċ-ċifra diġà tħallset mill-fond tal-lotteriji ta’ diversi rigali u affarijiet oħra li jsiru kull ġimgħa f’San Ġorġ bil-ħidma ta’ Mons. Feliċ Tabone, Emanuel Grima u d-diversi adoloxxenti li jgħinuhom.  Iktar kmieni s-sena l-oħra, kif konna anki ħabbarna f’din l-istess rubrika, diġà kienu ġew akkwistati għal San Ġorġ tmenin siġġu ieħor bil-prezz baxx ħafna ta’ €600, li bħal ta’ qabel diġà tħallsu mill-istess fond tal-lotteriji u bdew jintużaw, primarjament fis-Sala Mons. Emanuel Mercieca.  Min jixtieq jagħti xi kontribuzzjoni għal dawn l-ispejjeż għandu jikkuntattja l-Uffiċċju Parrokkjali jew ikellem lill-vigarju parrokkjali Mons. Feliċ Tabone.

Printer Friendly Version Send Article to a Friend

Name A value is required. Invalid format.	Email Address: A value is required. Invalid format.
Please enter the text above exactly as it appears (case sensitive)
When you click on "Submit Comment", a confirmtion email is automatically sent to the address you specified above. You will then be required to confirm this comment by clicking the link provided in this email that you will receive. Comments also need to be confirmed by the administration.