Artiklu li deher f’Il-Belt Victoria riprodott fir-rivista tas-Salesjani Maltin
Fir-rivista Il-Ħajja Salesjana ta’ Jannar-Frar 2010 deher artiklu ta’ John Cremona, membru tal-parroċċa li hu attiv ħafna fi ħdan l-Oratorju Don Bosco, fl-okkażjoni tal-ħamsa u sebgħin anniversarju mill-ftuħ ta’ l-Oratorju Don Bosco, li fil-fatt ġie ċċelebrat is-sena l-oħra.L-artiklu jġib l-isem Don Bosco: 75 sena f’Għawdex, u fil-fatt hu riproduzzjoni ta’ dak li kien deher fl-edizzjoni ta’ Mejju-Ġunju 2009 tal-pubblikazzjoni parrokkjali tagħna Il-Belt Victoria, sintendi miktub minn John Cremona. Dan l-artiklu jeħodna lura lejn iż-żmien tal-bidu, meta l-Oratorju fetaħ fi Triq Karità, ftit passi ’l bogħod minn San Ġorġ, b’inizjattiva ta’ Dun Pawl Micallef, sagristan maġġuri f’din il-knisja parrokkjali.L-ewwel festi ta’ San Ġwann Bosco, bit-Tridu u l-purċissjoni, kienu wkoll isiru f’San Ġorġ.Ir-ritratt fl-ewwel faċċata fejn jidher l-artiklu juri bi prominenza l-ewwel oratorju fi Triq Karità.
Mons. Feliċ Tabone mistieden imexxi fix-Xagħra
Fi tmiem il-ġimgħa, fir-raħal tax-Xagħra ġiet iċċelebrata l-festa ta’ Sant’Anton Abbati, l-ewwel titular tal-parroċċa ta’ dak ir-raħal u protettur maħbub ta’ l-annimali, imma, iżjed minn hekk, ewlieni fost il-Missirijiet tad-Deżert li kellha l-Knisja fl-istorja għanja tagħha.Fost il-prelati mistiedna biex jagħtu s-servizz tagħhom matul din il-festa ħelwa, kien mistieden ukoll Mons. Feliċ Tabone, li ftit tax-xhur ilu ġie mogħti minn Ruma l-ġieħ ta’ Kappillan tal-Qdusija Tiegħu.Mons. Tabone mexxa l-konċelebrazzjoni ta’ l-ewwel jum tat-Tridu ta’ din il-festa.Dan kien nhar l-Erbgħa li għadda, 13 ta’ Jannar 2010, fis-6.30pm, fil-knisja ta’ Sant’Anton Abbati, ix-Xagħra, u l-istedina saritlu mill-Kan. Ġwann Sultana, rettur ta’ dik il-komunità.Matul din il-konċelebrazzjoni għamel l-omelija Mons. Lawrenz Sciberras, Biblista, u wara ntqalet il-Kurunella, tkanta l-Innu Popolari, kif ukoll ingħatat il-Barka Sagramentali minn Mons. Tabone nnifsu.Din kienet l-ewwel ċelebrazzjoni liturġika barra mill-parroċċa tagħna li Mons. Feliċ Tabone mexxa minn mindu ngħata t-titlu ta’ monsinjur.
Mitt sena tal-Museum tal-Bniet
Nhar l-Erbgħa 13 ta’ Jannar ukoll, il-membri nisa tas-Soċjetà tad-Duttrina Nisranija f’Għawdex, flimkien ma’ bosta oħra minn Malta, fakkru għeluq il-mitt sena mit-twaqqif tal-fergħa femminili tal-Museum minn Dun Ġorġ Preca, b’konċelebrazzjoni ta’ radd il-ħajr fil-bażilika Ta’ Pinu, immexxija mill-isqof ta’ Għawdex Mons. Mario Grech, fis-6.30pm.Ċelebrazzjoni simili kienet saret Malta wkoll xi jiem qabel.Il-parroċċa tagħna għandha numru sabiħ ta’ membri fi ħdanha li huma mseħbin f’din l-għaqda tat-tagħlim imwaqqfa mill-qaddis Malti Dun Ġorġ, u trodd ħajr kontinwament lil Alla tas-servizz li huma, flimkien ma’ sħabhom tal-fergħa maskili, jagħtu fil-katekiżmu sân lil uliedna.
San Ġorġ fuq il-bulettin djoċesan
Fil-bulettin ta’ tmiem il-ġimgħa li għaddiet, fuq wara tal-qoxra ta’ barra li hi stampata mid-djoċesi, issemmiet il-parroċċa ta’ San Ġorġ.Hemm insibu artiklu żgħir fuq is-sittin anniversarju tal-Leġjun ta’ Marija f’Għawdex.Il-Leġjun ta’ Marija twaqqaf fis-7 ta’ Settembru 1921 fil-belt ta’ Dublin, l-Irlanda.Fis-sena 1940 saret l-ewwel laqgħa ta’ l-istess Leġjun f’Malta u għaxar snin wara, fl-1950, iltaqa’ l-ewwel præsidium f’Għawdex.Fil-fatt din il-laqgħa kienet saret nhar it-22 ta’ Jannar 1950, fis-sagristija tal-knisja parrokkjali ta’ San Ġorġ.L-E.T. Mons. Ġużeppi Pace, dak in-nhar isqof ta’ Għawdex, ta l-permess meħtieġ, u mbagħad, grazzi għall-għajnuna u l-isforzi ta’ Joseph Booker u Carmelo Formosa, il-Leġjun tefa’ l-għeruq tiegħu fil-gżira, fejn komplew jiżdiedu l-præsidia u l-organi l-oħra tal-Leġjun.Il-lum bosta tfal, adoloxxenti, żgħażagħ u adulti mill-parroċċa tagħna huma membri tiegħu.Bħala radd il-ħajr lil Alla, nhar il-Ħadd 24 ta’ Jannar 2010 sa ssir konċelebrazzjoni mmexxija mill-E.T. Mons. Nikol Ġ. Cauchi, isqof emeritu ta’ Għawdex, fis-santwarju Ta’ Pinu, fit-3.30pm.Għal aktar informazzjoni fuq il-Leġjun u l-præsidia tiegħu f’Għawdex, wieħed jista’ jżur is-sit elettroniku www.gozolegion.org.
L-Azzjoni Kattolika b’ġimgħa speċjali
F’dak li għandu x’jaqsam ma’ l-għaqdiet ta’ appostolat, kif wieħed jista’ jara, hemm ħafna attività għaddejja f’dawn il-jiem.Fil-fatt, il-Ħadd li għadda, 17 ta’ Jannar 2010, fis-6.00pm, l-arċipriet Mons. Pawlu Cardona mexxa Quddiesa fil-bażilika li għaliha attendew il-membri lajċi tal-parroċċa tagħna li huma impenjati fl-Azzjoni Kattolika.Anima Antoine Vassallo, attiv sew fl-Azzjoni, li hu lajk impenjat ħafna fil-parroċċa. Fl-aħħar ġimgħa l-Azzjoni Kattolika fir-Rabat (u m’hux f’Għawdex kif inkiteb fil-bulettin!) organizzat jiem speċjali ta’ aġġornament, li għalqu b’Quddies fiż-żewġ parroċċi mmexxija mill-arċiprieti.
Ħarġet Il-Belt Victoria
Fi tmiem il-ġimgħa ġiet stampata l-aħħar edizzjoni għas-sena 2009 tal-pubblikazzjoni bimensili Il-Belt Victoria.Din l-edizzjoni, li hi ta’ Novembru-Diċembru, tqassmet mal-bulettin ta’ tmiem il-ġimgħa.Fuq il-qoxra ta’ quddiem insibu ritratt mill-isbaħ ta’ mument miċ-ċelebrazzjoni li saret fi tmiem in-Novena tal-Milied għat-tfal.Dan qed jakkumpanja l-analiżi ta’ Antoine Vassallo, Pjan Pastorali… għad-djoċesi u għall-parroċċa – Ħarsa lura u oħra ’l quddiem.Fin-naħa t’isfel insibu introduzzjoni għal xi artikli li jinsabu ġewwa, bi tliet ritratti tal-mibki poeta Għawdxi Ġorġ Pisani, ta’ l-istoriku Pawlu Mizzi u ta’ Mons. Feliċ Tabone, rispettivament.F’din l-edizzjoni, bħal dawk ta’ qabel, fil-bidu nsibu l-editorjal, bit-tema Il-Milied żmien ta’ ferħ, kif ukoll il-messaġġ ta’ l-Arċipriet, li wkoll jittratta s-sens veru tal-Milied.Fost id-diversi artikli interessanti l-ewwel wieħed hu fuq l-għaxar snin ta’ preżenza parrokkjali fuq l-internet tal-websajt tal-parroċċa u l-ħames snin bid-dehra attwali.Francesco Pio jtemm is-sensiela tiegħu Fuq il-passi ta’ San Pawl fil-bażilika tagħna – Dawra ma’ l-Arti Pawlina f’San Ġorġ, bl-artiklu ta’ din id-darba jittratta l-kwadru tan-Nawfraġju ta’ San Pawl, ta’ Mario Caffaro Rore.Is-sensiela ħabtet ma’ għeluq is-Sena Pawlina li sar f’nofs l-2009.Insibu tislima lis-Sur Pawlu Mizzi f’għeluq it-tmenin sena, kif ukoll tislima lill-poeta Għawdxi Ġorġ Pisani fis-sena taċ-ċentinarju mit-twelid tiegħu (1909-2009).Hemm ukoll rapport qasir fuq Festival Mediterranea 2009 minn James L. Borg, u artiklu ieħor ta’ Antoine Vassallo bit-titlu Wasal ħin il-benefatturi! fis-sensiela tiegħu Mużew tagħna, Mużew għal kulħadd – Lejn twettiq ta’ ħolma.L-istess awtur ikompli s-sensiela tiegħu Qaddisin Ġorġjani, din id-darba b’tagħrif fuq San Adomnánu.Wara dawn l-artikli nsibu l-paġna tat-tfal, li din id-darba turi tpinġijiet u ittri tat-tfal lil Ġesù Bambin miktuba din is-sena, u t-tisliba.Fl-aħħar paġni Andrew Formosa jkompli s-sensiela tiegħu Mid-Djarju Parrokkjali, b’dak li seħħ bejn Ottubru u Novembru tas-sena li għaddiet.Fil-qoxra ta’ wara, li flimkien ma’ ta’ quddiem din id-darba hi bil-kulur, insibu rapport fuq il-monsinjuri l-ġodda mill-parroċċa tagħna, b’żewġ ritratti marbuta ma’ din il-ġrajja.Isfel tal-paġna hemm l-awgurju tal-bord editorjali għall-festi tal-Milied b’ritratt tal-presepju li kien armat fil-bażilika ta’ San Ġorg fi żmien il-Milied li għadda.
L-Ottava tat-Talb għall-Għaqda tal-Kristjani
Il-bieraħ, it-Tnejn 18 ta’ Jannar 2010, bdiet il-Ġimgħa ta’ Talb għall-Għaqda fost il-Knejjes Kristjani.Skond it-Tieni Sinodu ta’ Għawdex, fid-Digrieti 71B u 72 fuq din il-Ġimgħa ta’ Talb għall-Għaqda tal-Kristjani, “għandha tkun imħeġġa bil-ħerqa kollha l-ħidma ekumenika ma’ ħutna l-Insara li m’humiex f’għaqda sħiħa mal-Knisja. Peress li meħtieġ ħafna t-talb, huma rrikmandati ħafna l-‘Ġimgħat għall-Għaqda tal-Knejjes’ li jsiru fil-parroċċi, kif ukoll is-servizz ekumeniku li għandu jsir għall-inqas darba fis-sena.Huwa mixtieq li l-Kattoliċi jissieħbu ma’ l-aħwa mifrudin minna sabiex jagħmlu talb lil Alla fi kwalunkwe ħtieġa komuni li fiha jistgħu u għandhom jikkoperaw flimkien, per eżempju sabiex jissaħħu l-paċi fejjieda u l-ġustizzja soċjali, il-karità reċiproka fost il-bnedmin, id-dinjità tal-familja u ħwejjeġ bħal dawn”.L-Ottava tat-Talb bdiet issir fis-sena 1908.Is-suġġett li ntgħażel għal din is-sena hu meħud minn Luqa 24:28, bit-tema “Intom xhud ta’ dan”.Għalhekk aħna mistednin li f’din l-Ottava nitolbu biex isseħħ din l-għaqda tant mixtieqa minn Kristu, anki waqt il-Quddies u talb ieħor li jsir fil-bażilika.Din iż-żmien ta’ talb jiġi fi tmiemu nhar it-Tnejn 25 ta’ Jannar 2010.
Preparazzjoni għar-Randan
Dawn il-ġranet fl-uffiċċju parrokkjali qed isir xogħol ta’ tħejjija għall-programm parrokkjali tar-Randan u l-Ġimgħa Mqaddsa.Billi l-ġimgħa d-dieħla mistennija jiltaqgħu kemm il-Presbiterju u kemm il-Kunsill Pastorali Parrokkjali, dawn sa jiddiskutu bidliet meħtieġa u proposti ġodda li jistgħu jiżdiedu ma’ l-istruttura tradizzjonali ta’ dan iż-żmien liturġiku qawwi, meta l-parroċċa tkun impenjata speċjalment bl-eżerċizzi spiritwali, li l-predikaturi tagħhom ilhom ibbukkjati minn kmieni s-sena l-oħra.Għaddejjin ukoll tħejjijiet loġistiċi għal bosta attivitajiet li bihom hu mħawwar dan iż-żmien qaddis, li din is-sena sa jibda fis-17 ta’ Frar.
