Dil-ġimgħa f'San Ġorġ

Lectio Divina għas-saċerdoti ta’ Żona A

Nhar it-Tlieta 5 ta’ Jannar 2010 f’San Ġorġ saret l-ewwel Lectio Divina ta’ din is-sena għas-saċerdoti ta’ Żona A.  Kienu preżenti qassisin mill-parroċċi tal-Katidral, tal-Fontana u tagħna, kif ukoll mill-knejjes tax-Xlendi u ta’ Marsalforn.  Il-laqgħa bdiet fl-4.00pm, fl-Awla Mons. Giuseppe Farrugia, b’riflessjoni fuq l-Iskrittura minn Mons. Anton Mizzi, Biblista.  Wara ngħatat il-barka Ewkaristika minn Mons. Feliċ Tabone, imbagħad l-isqof Mons. Mario Grech għalaq b’messaġġ qasir.  Wara din il-laqgħa dawk preżenti kienu mistednin għal ftit kafè fir-refettorju tal-bażilika.

Ħareġ il-Kalendarju Parrokkjali 2010

Mal-bulettin ta’ din il-ġimgħa tqassam il-kalendarju l-ġdid għal din is-sena li għadha kemm rat il-bidu tagħha ftit tal-jiem ilu.  L-uffiċċju parrokkjali, li jħejji dan il-kalendarju, din is-sena għall-qoxra ta’ quddiem għażel ritratt mill-isbaħ ta’ l-altar tal-bażilika ta’ San Ġorġ.  Ir-ritratt ittieħed minn Joe Attard, kollaburatur ta’ din il-websajt, li spiss ifornina b’diversi ritratti.  L-altar prinċipali tal-bażilika tagħna, disinn u xogħol fl-irħam tal-Prof. Carlo Pisi (1897-1979), din is-sena qed jagħlaq ħamsin sena mill-konsagrazzjoni tiegħu li kienet saret f’Diċembru 1960.  Element innovattiv li qed jidher fil-kalendarju ta’ din is-sena hu li fuq in-naħa tal-lemin tal-paġna ta’ kull xahar hemm lista ta’ l-avvenimenti importanti li jkunu sa jseħħu fil-parroċċa matul dak ix-xahar bid-data tal-ġurnata rispettiva tagħhom, waqt li d-dati u l-ismijiet tal-qaddisin għal kull ġurnata ukoll huma ppreżentati fi stil differenti minn tas-soltu: f’kaxxi żgħar.  Fuq l-istess naħa, aktar ’l isfel, insibu d-dati ta’ meta tiftaħ u tagħlaq kull skeda tar-radju komunitarju tal-parroċċa tagħna Leħen il-Belt Victoria.  Tagħrif ieħor jinsab fuq il-qoxra ta’ wara.  Min għadu ma rċeviex kopja ta’ dan il-kalendarju jista’ jgħaddi sa l-uffiċċju parrokkjali.  Kull donazzjoni tkun apprezzata ferm!

Riċiviment Annwali

Nhar is-Sibt li għadda, 9 ta’ Jannar 2010, sar ir-riċiviment annwali marbut mal-festi tal-Milied u l-ewwel tas-sena.  Ir-riċiviment beda fis-7.30pm u ġie fi tmiemu għall-ħabta tad-9.15pm.  Għal din l-okkażjoni, barra s-Sala Mons. Emanuel Mercieca, infetħu għall-ewwel darba, wara l-manutenzjoni li saret fihom, l-Awla Kapitulari u l-librerija parrokkjali.  Kienu preżenti għal dan ir-riċiviment diversi benefatturi u voluntiera li jgħinu f’San Ġorġ, fosthom abbatini, saċerdoti, il-membri tal-Ladies Society, diversi membri ta’ kumitati fi ħdan il-parroċċa tagħna, membri mill-kor tal-bażilika Laudate Pueri, id-diversi tekniċi u preżentaturi ta’ l-istazzjon komunitarju Leħen il-Belt Victoria, kif ukoll membri mis-Soċjetà Filarmonika La Stella.  Kienu responsabbli mit-tisjir u t-tqassim ta’ l-ikel Ċensu Fenech u Ġużeppi Buhagiar.  Fi tmiem ir-riċiviment l-arċipriet Mons. Pawlu Cardona għamel kelmtejn ta’ ringrazzjament lil dawk kollha li jagħtu l-kontribut tagħhom f’San Ġorġ matul is-sena.

Ħamsin sena miżżewġin

Nhar il-Ħadd 10 ta’ Jannar 2010 il-Quddiesa tal-11.00am kienet waħda ta’ ringrazzjament lil Alla f’għeluq il-ħamsin sena miż-żwieġ ta’ Francis X. Borg u martu Victoria.  Din il-Quddiesa tmexxiet mill-arċipriet emeritu Mons. Ġużeppi Farrugia, flimkien ma’ Mons. Ġużeppi Curmi u Mons. Ġużeppi Cauchi.  Waqt l-omelija Mons. Farrugia tkellem fuq il-ħajja ta’ din il-familja, kif ukoll fuq ix-xogħol kbir li Ċikku, kif hu magħruf Francis X. Borg, għamel b’riżq il-parroċċa ta’ San Ġorġ, fosthom is-siġġijiet, u issa l-ġinokkjaturi l-ġodda li tqiegħdu fil-bażilika ftit jiem qabel il-festi li għadhom kemm għaddew.  Borg hu l-fundatur u, flimkien ma’ wliedu, il-propjetarju tad-ditta magħrufa ta’ l-injam FXB Ltd, li l-lum il-produzzjoni tagħha ħarġet ukoll barra minn xtutna.  Fl-aħħar tal-Quddiesa nqrat il-barka speċjali mibgħuta mingħand il-Papa Benedittu XVI permezz ta’ Mons. Alfred Xuereb.  Għal din il-Quddiesa kien hemm preżenti l-ulied u l-qraba ta’ din il-koppja, fosthom Joe, iben Francis u Vitorina, kollaboratur ewlieni fi ħdan il-parroċċa.  Anima l-Quddiesa l-kor tal-bażilika Laudate Pueri.  

Jidħlu iżjed donazzjonijiet ta’ l-Istrina 2010

F’dawn l-aħħar ġranet komplew jidħlu xi envelopes bl-Istrina lill-parroċċa.  Grazzi mill-qalb lil dawk kollha li diġà taw id-donazzjoni tagħhom.  L-envelope tqassam mal-bulettin ta’ xi ġimgħa ilu, u hu stedina lil kull familja biex tagħti d-donazzjoni tagħha lill-parroċċa fl-okkażjoni tas-sena l-ġdida.  Kull għotja tista’ tintbagħat mad-distributuri tal-bulettin, jew tintefa’ fil-ġabra tal-Ħadd fil-knisja, jew inkella titwassal fl-uffiċċju parrokkjali.  Dawk li huma msefrin jistgħu jibagħtu email fuq info@sangorg.org u ngħarrfuhom kif jistgħu jittrasferrixxu d-donazzjoni tagħhom b’mod elettroniku.

Quddiesa ta’ Mro Dr John Galea magħżula għaż-żjara tal-Papa

F’dawn il-jiem fuq il-media qed naraw u nisimgħu ħafna fuq il-miġja tal-Papa Benedittu XVI fis-17 u t-18 ta’ April li ġejjin.  Fost it-tħejjijiet li qed isiru, fl-aħħar jiem ġew imħabbra mill-Kurja ta’ Malta l-logo uffiċjali taż-żjara, il-korijiet li sa jkantaw, kif ukoll il-mużika magħżula għall-Quddiesa tal-Papa fuq il-Fosos tal-Furjana, il-Ħadd 18 ta’ April 2010, fil-għodu.  Il-Quddiesa li ntgħażlet hi dik li kkompona Dr John Galea, bl-isem Missa in Fractione Panis, fl-okkażjoni tal-ħamsa u għoxrin anniversarju presbiterali ta’ l-isqof Mons. Mario Grech, u li ndaqqet għal-ewwel darba fil-pontifikal iċċelebrat fil-Katidral ta’ Għawdex, nhar il-Ġimgħa 26 ta’ Lulju 2009, fil-għaxija.  Il-Quddiesa hija bbażata fuq il-Missa de Angelis bil-kor ikanta a quattro voci u jalterna mal-kongregazzjoni.  Fl-aħħar ta’ dik l-okkażjoni, Dr John Galea kien ippreżenta din il-Quddiesa lill-isqof Grech.  Galea, direttur mużikali u kompożitur, hu iben il-parroċċa ta’ San Ġorġ, u għandu f’idejh it-treġija tal-Chorus Urbanus, li twaqqaf fil-parroċċa tagħna fl-1975.  Min-naħa l-oħra, id-disinn li ntgħażel għal-logo uffiċjali taż-żjara hu dak ta’ Mario Abela, ukoll mir-Rabat ta’ Għawdex.

San Ġorġ fuq il-media

Nhar il-Ħadd li għadda, 10 ta’ Jannar 2010, fuq il-paġna ta’ Għawdex tal-ġurnal The Sunday Times dehru żewġ ritratti li għandhom rabta mal-bażilika tagħna.  L-ewwel ritratt hu tal-kor Laudate Pueri f’kunċert annwali fix-Xagħra li sar nhar it-Tlieta 22 ta’ Diċembru 2009.  Fir-ritratt jidher il-kor ikanta, taħt id-direzzjoni tal-Kan. George J. Frendo.  Fir-ritratt l-ieħor, li kien meħud minn fuq is-swar taċ-Ċittadella, tidher prominenti fil-qalba tal-belt l-antika l-bażilika ta’ San Ġorġ, mixgħula fl-isfond f’nofs bosta djar.  Dan ir-ritratt deher fuq il-Gozo Page għax kien ir-rebbieħ ta’ kompetizzjoni tar-ritratti mtella’ fuq din il-paġna.  Ritratt ieħor deher fuq il-qoxra ta’ wara ta’ Il-Ħajja f’Għawdex, rivista tad-djoċesi li toħroġ kull xahar, fl-edizzjoni ta’ Diċembru 2009.  Il-paġna fiha għażla ta’ ritratti tal-Milied Għawdxi, fosthom ritratt ta’ Triq ir-Repubblika fil-parti ta’ quddiem it-Teatru Astra mżejna u mixgħula kif kienet fi żmien il-festi li għaddew, u ieħor ta’ parti mill-Christmas Village imtella’ din is-sena mill-kunsill lokali ta’ beltna fi Pjazza San Ġorġ.  Imbagħad, bħala sfond, tidher il-faċċata tal-bażilika ta’ San Ġorġ fil-festi tal-Milied ta’ din is-sena, b’żewġt itfal żgħar jilagħbu fuq it-taraġ.

Grupp ta’ presepisti Taljani sa jżuru Għawdex

Fuq stedina ta’ l-Għaqda Ħbieb tal-Presepju Għawdex-Malta, l-Associazione Italiana Amici del Presepio sa torganizza żjara f’Għawdex f’Mejju li ġej.  Fir-rivista li toħroġ din l-assoċjazzjoni nsibu l-programm ta’ din iż-żjara.  Fost l-oħrajn, il-Ġimgħa 21 ta’ Mejju 2010 il-grupp imdaqqas ta’ presepisti Taljani sa jżur il-bażilika ta’ San Ġorġ, bħala wieħed mill-postijiet Għawdxin li għandhom rabta importanti mal-kult tal-Milied fil-gżira.  Huma sa jżuru wkoll għadd ta’ presepji magħmula minn dilettanti mir-Rabat, fosthom dak monumentali ta’ Frankie Mizzi, u dawk ta’ Anton Sillato, Giovanni Cassar u Toni Vassallo li sa jżommuhom armati apposta sa dak in-nhar, kif ukoll sa jattendu għal kunċert li sa jtella’ l-Chorus Urbanus fil-kunvent ta’ Sant’Wistin.

Printer Friendly Version Send Article to a Friend

Name A value is required. Invalid format.	Email Address: A value is required. Invalid format.
Please enter the text above exactly as it appears (case sensitive)
When you click on "Submit Comment", a confirmtion email is automatically sent to the address you specified above. You will then be required to confirm this comment by clicking the link provided in this email that you will receive. Comments also need to be confirmed by the administration.