Il-Kunsill Pastorali Parrokkjali tal-parroċċa ltaqa’ għat-tielet u l-aħħar laqgħa tiegħu għas-sena 2009, nhar l-Erbgħa 30 ta’ Diċembru, fis-6.00pm, fl-Awla Mons. Giuseppe Farrugia.It-temi fuq l-aġenda kienu: post-mortem tal-programm ta’ l-Avvent u l-Milied 2009; il-proposta djoċesana ġdida għall-parroċċi kollha li tinbeda mixja kateketika mal-koppji li żżewġu fl-aħħar ħames snin, u li l-parroċċa tagħna sa tibdiha lejn nofs Marzu; u ħarsa ’l quddiem lejn ir-Randan 2010.Fost l-oħrajn il-membri preżenti kellhom kliem ta’ apprezzament għall-mod kif ġiet organizzata n-Novena tal-Milied għat-tfal din is-sena, u għall-bidla tal-ħin għas-6.00pm, li jidher li għall-maġġoranza tal-ġenituri hu iżjed konvenjenti minn dak tal-5.00pm.Sar aġġornament għal-laqgħa li jmiss, nhar it-28 ta’ Jannar 2010.Fil-ġimgħat li ġejjin għandhom jiltaqgħu wkoll xi kumitati oħra tal-parroċċa, fosthom dak liturġiku u l-Kunsill Amministrattiv.
Festa Laternanensi ta’ San Silvestru I, Papa
Nhar il-Ħamis li għadda, 31 ta’ Diċembru 2009, kien l-aħħar jum tas-sena, u l-bażilika tagħna ċċelebrat il-festa Lateranensi tal-Papa San Silvestru I,fundatur ta’ l-arċibażilika tal-Lateran f’Ruma.Fid-9.00am l-arċipriet Mons. Pawlu Cardona fetaħ b’Quddiesa jum ta’ adorazzjoni solenni b’radd il-ħajr lil Alla għas-sena li kienet qed tintemm. Għaqdiet reliġjużi, gruppi spiritwali kif ukoll xi katekisti tal-parroċċa ħadu ħsieb l-organizzazzjoni ta’ xi sigħat minnhom.Imbagħad fl-4.30pm sar l-ewwel Għasar tas-solennità ta’ Marija, Omm Alla, mill-kapitlu tal-kolleġġjata.Fil-5.00pm l-isqof Mons. Mario Grech mexxa konċelebrazzjoni pontifikali bis-sehem tal-kapitlu u l-kleru, li fi tmiemha tkanta t-Te Deum, b’radd il-ħajr fi tmien sena oħra, li wieħed jista’ jara filmat tiegħu fuq il-kanal tal-YouTube tal-bażilika.Kanta l-kor Laudate Pueri taħt id-direzzjoni tal-Kan. George J. Frendo. Fil-għaxija, imbagħad, bejn it-8.00 u d-9.00pm, saret velja ta’ adorazzjoni u talb fil-bażilika b’radd il-ħajr lil Alla, li tmexxiet mill-Arċipriet u tulha sar qari ta’ riflessjonijiet kif ukoll kant ta’ żmien il-Milied.Il-funzjonijiet ta’ din il-ġurnata xxandru diretti fuq Leħen il-Belt Victoria.Pjazza San Ġorġ kienet iċ-ċentru ta’ ħafna attività fil-lejl ta’ bejn l-aħħar u l-ewwel tas-sena, organizzata mill-kunsill lokali tal-belt.
L-Ewwel tas-Sena
Il-Ġimgħa, imbagħad, l-ewwel ġurnata tas-sena l-ġdida, il-Knisja ċċelebrat is-solennità tal-Verġni Marija, Omm Alla.Din hi festa kmandata u għalhekk kien jum ta’ obbligu tal-Quddies; barra minn hekk inzertat ukoll l-ewwel Ġimgħa tax-xahar. F’San Ġorġ il-ħin tal-Quddies kien bħal dak tal-Ħadd.Fil-11.00am saret konċelebrazzjoni pontifikali bis-sehem tal-kapitlu u l-kleru, li kienet għal darb’oħra ppreseduta mill-isqof ta’ Għawdex Mons. Mario Grech, dekan tal-kolleġġjata.Anima l-kor tal-bażilika Laudate Pueri.Fl-10.30am, madwar nofs siegħa qabel bdiet il-konċelebrazzjoni, fis-sagristija sar it-Tifħir ta’ Sbiħ il-Jum u t-Talb ta’ Nofs il-Jum mill-kapitlu tal-kolleġġjata.Imbagħad, bħal f’kull okkażjoni importanti f’dawn il-jiem ta’ festi li għaddew, fl-4.30pm sar it-tieni Għasar tas-solennità mill-kapitlu.Ħaġa li ħafna nnotaw kienet il-massa kbira ta’ nies li attendiet għall-Quddies ta’ fil-għaxija fil-bażilika f’dan il-jum.
Solennità ta’ l-Epifanija tal-Mulej
Nhar il-Ħadd li għadda, 3 ta’ Jannar 2010, il-Knisja għamlet is-solennità ta’ l-Epifanija tal-Mulej, li fil-parroċċa tagħna niċċelebrawha wkoll bil-festa parrokkjali ta’ Ġesù u Marija, li lilhom hi ddedikata l-kappella fejn fl-antik kien jinżamm is-Sagrament, u fejn bħalissa hemm armat il-presepju.L-Epifanija għandha importanza maġġuri fil-kalendarju liturġiku tal-Milied.Fil-11.00am l-isqof Mons. Mario Grech mexxa konċelebrazzjoni pontifikali bis-sehem tal-kapitlu u l-kleru, li fiha saret it-tħabbira tas-solennitajiet u t-tifkiriet festivi tas-sena l-ġdida li għadna kemm bdejna,minn Dun Joseph Mercieca, il-kantur uffiċjali fil-liturġiji tal-bażilika.Qabel il-konċelebrazzjoni, fis-sagristija ta’ San Ġorġ sar it-Tifħir ta’ Sbiħ il-Jum u t-Talb ta’ Nofs il-Jum mill-kapitlu tal-kolleġġjata.Wara, imbagħad, saret ikla tal-ħbieb fir-refettorju tad-dar parrokkjali.
Ikla tal-Ħbieb
Wara l-Pontifikal ta’ nhar l-Epifanija, l-Isqof kien mistieden għal “Ikla tal-Ħbieb” fir-refettorju tad-dar parrokkjali, flimkien mal-kleru tal-parroċċa kif ukoll xi lajċi impenjati fl-uffiċċju parrokkjali.Fost is-saċerdoti li attendew kien hemm l-arċipriet Mons. Pawlu Cardona, kif ukoll l-arċipriet emeritu Mons. Ġużeppi Farrugia, u s-seminaristi Simon M. Cachia u Samuel Grech.L-ikel ġie mħejji minn Ċensu Fenech, bl-għajnuna ta’ persuni oħra li għenu fil-kċina.Fi tmiem l-ikla Mons. Arċipriet għamel kelmtejn ta’ ringrazzjament u awgurju għas-sena l-ġdida lil dawk preżenti.
Tkompli l-Quddiesa tat-Tfal
Wara l-festi tal-Milied u ta’ l-Ewwel tas-Sena, issa jkomplu bosta attivitajiet regolari fil-parroċċa ta’ San Ġorġ.Fosthom hemm il-Quddiesa għat-Tfal u l-Adoloxxenti, li ssir kull nhar ta’ Ħadd fil-5.00pm.It-tfal u l-adoloxxenti, li ħafna minnhom ippakkjaw il-bażilika għall-jiem sbieħ tan-Novena tal-Milied, issa huma mistiedna flimkien mal-ġenituri tagħhom għal din il-Quddiesa li tkun apposta għalihom.
Ċertifikati fil-Kompetizzjoni tal-Presepji
Fil-fatt, fil-Quddiesa tat-Tfal ta’ nhar il-Ħadd li għadda, jum l-Epifanija, l-Arċipriet qassam ċertifikati ta’ partiċipazzjoni lil dawk it-tfal li ħadu sehem fil-Kompetizzjoni ta’ Presepji, Grotti u Twieqi li l-parroċċa organizzat dan il-Milied.Il-ġurija żaret id-djar tat-tmien parteċipanti fl-aħħar jiem, u ddeċidiet li x-xogħlijiet kollha kienu sbieħ ħafna.Il-ħsieb tal-kompetizzjoni hu li titrawwem imħabba speċjali lejn il-presepju fid-djar tal-familji tagħna.Hu ttamat li iktar tfal jitħajru jieħdu sehem fis-snin li ġejjin.L-inizjattiva hi qadima ħafna fil-parroċċa, iżda reġgħet tqajmet sentejn ilu.Fi tmiem il-Quddiesa tal-Ħadd it-tfal kollha mxew f’purċissjoni lejn il-kappella ta’ Ġesù u Marija, ikantaw l-innu sabiħQed jinfirex mal-widien, u ħadu ritratt ta’ l-okkażjoni quddiem il-presepju tal-bażilika.
Strina 2010
Bħal kull sena f’dawn il-jiem tqassam envelop biex kull min jista’ jagħti donazzjoni żgħira bħala strina lill-parroċċa fil-bidu ta’ din is-sena l-ġdida.L-enveloptqassam mal-bulettin ta’ din il-ġimgħa, u hu stedina lil kull familja biex tagħti d-donazzjoni tagħha lill-parroċċa tagħna.L-envelop bl-għotja tagħkom tistgħu tibagħtuh mad-distributur tal-bulettin tat-triq tagħkom, titfgħuh mal-ġabra tal-Ħadd fil-knisja, jew inkella twassluh intom stess fl-uffiċċju parrokkjali.Dawk li huma msefrin jistgħu jibagħtulna email fuq info@sangorg.org u ngħarrfuhom kif jistgħu jittrasferrixxu d-donazzjoni tagħhom b’mod elettroniku.L-għotja tagħkom, żgħira kemm hi żgħira, tista’ tgħinna nibdew proġetti importanti li huma meħtieġa fil-manutenzjoni.
Leħen il-Belt Victoria bl-iskeda tax-Xitwa
Wara l-impenn fil-jiem festivi li għaddew, l-istazzjon komunitarju tal-parroċċa Leħen il-Belt Victoria, nhar it-Tnejn li għadda, 4 ta’ Jannar 2010, qaleb għall-iskeda ridotta tax-Xitwa.Din l-iskeda għandha sat-13 ta’ Marzu, u fiha nsibu varjetà ta’ programmi interessanti.Fil-fatt f’din l-iskeda nsibu wkoll xi preżentaturi u programmi ġodda, fosthom il-qari tar-rumanz ta’ Herbet Ganado, Rajt Malta tinbidel, minn George N. Cassar, Mużika u Sports ma’ Andrea Debrincat, u l-programm ta’ Stefan Scicluna Personalitajiet.Dan ta’ l-aħħar sa jkun qed jixxandar kull nhar ta’ Sibt wara nofs in-nhar, flimkien ma’ diversi programmi oħrajn, u allura għall-ewwel darba fi skeda ridotta, is-Sibt wara nofs in-nhar Leħen il-Belt Victoria sa jibqa’ mas-semmiegħa flok ma jaqleb fuq l-istazzjon Taljan In Blu.Aktar informazzjoni takkwistawha mill-iskeda li tqassmet mal-bulettin ta’ tmiem il-ġimgħa, kif ukoll minn fuq din il-websajt jew il-websajt tar-radju, www.lbv104.com.
Quddiesa b’suffraġju ta’ Mons. Tumas Curmi
Il-bieraħ, it-Tnejn 4 ta’ Jannar 2010, fil-bażilika saret konċelebrazzjoni b’suffraġju ta’ Mons. Tumas Curmi, li miet fit-28 ta’ Novembru 2009, u li jiġi ħu Mons. Manwel Curmi, saċerdot oriġinarjament mill-Fontana imma li jservi fil-parroċċa tagħna,li għal snin twal kien id-direttur tal-Caritas ta’ Għawdex u hu d-diretturtal-Fondazzjoni Arka f’Għawdex.Din il-konċelebrazzjoni kienet fis-6.00pm u tmexxiet mill-istess Mons. Manwel Curmi.Għal din il-Quddiesa attendew bosta qraba tal-mejjet.
Kalendarju 2010 u Il-BeltVictoria
Fil-bidu tal-ġimgħa l-oħra saru l-aħħar preparamenti mill-uffiċċju parrokkjali fuq il-kalendarju tal-parroċċa għall-2010.Il-kalendarju issa lest u ilu għal dawn l-aħħar jiem għand l-A&M Print tal-Qala fejn qed jiġi stampat, u dalwaqt għandu jasal biex hekk ikun jista’ jitqassam lill-parruċċani mal-bulettin tal-Ħadd li ġej.It-tema prinċipali li ntgħażlet din is-sena hi dik ta’ l-altar; dan għax l-2010 hi s-sena tal-ħamsin anniversarju mill-konsagrazzjoni ta’ l-altar-mejda tal-bażilika, li jinsab taħt it-tribuna.Min-naħa l-oħra l-pubblikazzjoni bimensili Il-Belt Victoria dalwaqt tintbagħat l-istamperija.Din hi l-aħħar edizzjoni tas-sena 2009, u għalhekk kull donazzjoni tkun apprezzata!
Xogħol fl-Awla Kapitulari u fil-Librerija
Wara tliet ġimgħat ta’ xogħol fl-Awla Kapitulari u fil-librerija parrokkjali, issa għadhom kemm ġew stivati l-kotba kollha fil-librerija wara li għal ħafna xhur kienu ilhom ippakkjati ġol-kaxxi fl-Awla Kapitulari.Kien hemm madwar mitejn kaxxa li kienu ġew mogħtija bħala rigal lill-bażilika ta’ San Ġorġ minn Dun Charles Cini sdb, iben il-parroċċa.Ix-xogħol sar taħt is-superviżjoni ta’ Mons. Feliċ Tabone u Emanuel Grima, u jgħinuhom kien hemm diversi voluntiera adoloxxenti, fosthom Dennis Tabone, Stefan Scicluna, George Formosa, Fernando Zammit u Eman Borg, li taw daqqa t’id sewwa fix-xogħol li kien meħtieġ.Issa l-Awla Kapitulari, li hi s-sede uffiċjali tal-kapitlu residenti fil-kolleġġjata tagħna, reġgħet ħadet ir-ruħ u d-dinjità ta’ qabel wara li tneħħa minnha u ġie organizzat aħjar il-materjal li kien hemm fiha.Fl-istess waqt is-sala ngħatat tindifa tajba u tqiegħdu f’posthom bosta oġġetti prezzjużi li fiha, bħalma hu t-tron ta’ l-isqof u kwadri ta’ pittura li jżejnuha. Fil-fatt, nhar is-Sibt li ġej, 9 ta’ Jannar 2010, l-awla sa tinfetaħ għar-riċeviment annwali għall-benefatturi u l-kollaboraturi,fi tmiem il-festi tal-Milied.Fil-librerija wkoll ġew stivati l-kotba kollha f’posthom u issa tista’ tibda tintuża.Grazzi mill-qalb li dawk kollha li taw il-kontribut tagħhom, kemm voluntiera u kemm benefatturi, biex, għal darb’oħra, taqsima oħra mill-kumpless tal-bażilika ta’ San Ġorġ terġa’ tiġi fuq saqajha u tibda titħaddem.
